స్థానిక ఎన్నికల్లో కూటమి ప్రభుత్వానికి ప్రజలే బుద్ధి చెబుతారు

అనంతపురం జిల్లా , పామిడి

ఎన్నికల సమయంలో ప్రజలకు ఇచ్చిన హామీలను అమలు చేయడంలో కూటమి ప్రభుత్వం విఫలమైందని వైఎస్సార్ కాంగ్రెస్ పార్టీ ఆంధ్రప్రదేశ్ రాష్ట్ర ఎస్టీ సెల్ ప్రధాన కార్యదర్శి మురళి నాయక్ ఆరోపించారు. సోమవారం పామిడి పట్టణంలోని ఆర్‌ అండ్‌ బీ బంగ్లాలో నిర్వహించిన విలేకరుల సమావేశంలో ఆయన మాట్లాడుతూ
ఎన్నికల ముందు అనేక హామీలు ఇచ్చి ప్రజల మద్దతుతో అధికారంలోకి వచ్చిన కూటమి ప్రభుత్వం, అధికారంలోకి వచ్చిన తర్వాత వాటిని అమలు చేయడంలో నిర్లక్ష్యం వహిస్తోందని మురళి నాయక్ ఆరోపించారు. ఇచ్చిన హామీలను నెరవేర్చకుండా, మరోసారి ఎన్నికలు సమీపించినప్పుడు కొత్త వాగ్దానాలతో ప్రజల ముందుకు రావాలని చూస్తోందని విమర్శించారు. హామీలను అమలు చేయకుండా ప్రజలను మభ్యపెట్టాలని చూస్తే సహించరని, రానున్న స్థానిక సంస్థల ఎన్నికల్లో ప్రజలు తమ తీర్పు ద్వారా సమాధానం చెబుతారన్నారు.
రాష్ట్రంలోని గిరిజనులు, పేదలు, రైతులు, మహిళలు, నిరుద్యోగులు ఎదుర్కొంటున్న సమస్యలను పరిష్కరించడంలో ప్రభుత్వం చిత్తశుద్ధితో వ్యవహరించాలని ఆయన డిమాండ్ చేశారు. ముఖ్యంగా గిరిజన ప్రాంతాల్లో రహదారులు, తాగునీరు, విద్యుత్, విద్య, వైద్యం వంటి కనీస సౌకర్యాలను మెరుగుపరచాలని కోరారు. గిరిజన సంక్షేమ పథకాలు అర్హులైన ప్రతి ఒక్కరికీ అందేలా చర్యలు తీసుకోవాలని సూచించారు.
ఎన్నికల సమయంలో ప్రజలకు ఇచ్చిన హామీల్లో ఎన్ని అమలు చేశారో, ఇంకా ఎన్ని అమలు చేయాల్సి ఉందో ప్రభుత్వం స్పష్టంగా వెల్లడించాలని మురళి నాయక్ అన్నారు. ప్రజల విశ్వాసాన్ని నిలబెట్టుకోవాలంటే హామీలను మాటలకే పరిమితం చేయకుండా ఆచరణలో అమలు చేయాలని పేర్కొన్నారు.
ప్రజా సమస్యలపై వైఎస్సార్ కాంగ్రెస్ పార్టీ నిరంతరం పోరాటం చేస్తుందని ఆయన తెలిపారు. గిరిజనులు, పేదలు, రైతులు, మహిళలు, నిరుద్యోగుల పక్షాన నిలబడి వారి సమస్యల పరిష్కారం కోసం ప్రభుత్వాన్ని ప్రశ్నిస్తామని స్పష్టం చేశారు. రానున్న స్థానిక సంస్థల ఎన్నికల్లో ప్రజలు తమ తీర్పు ద్వారా ప్రభుత్వానికి సమాధానం చెబుతారని మురళి నాయక్ పేర్కొన్నారు.

Related News

LEAVE A REPLY

Please enter your comment!
Please enter your name here

- Advertisement -spot_img

Latest News